FETE DE LA SAINTE FAMILLE : MUANDA PIKA-PENDE

Les fidèles de la paroisse Sainte Famille
de Muanda Pika-Pende,
ont connu la visite de S. Exc. Mgr
MBUKA Cyprien, cicm, évêque de Boma,
durant le week-end du 27 au 28 décembre 2008.
Chose normale, car le dimanche
28 décembre était la fête
de la Sainte Famille, patronne
de cette jeune paroisse, dont le presbytère
pousse déjà...Bravo !
Les fidèles ont réservé à leur Pasteur
un accueil plus que chaleureux !
Ci-après vous pourriez lire, en Kikongo,
l'homélie de Monseigneur au cours
de la messe. On remarquera dans les diapositives
que Mgr a conféré le sacrement de
confirmation à plus de deux cents jeunes.
Toute la visite peut-être visionner e diapositives à partir de l'adresse ci-après :
http://picasaweb.google.fr/cypmbuka/VISITEPASTORALEPIKAPENDEDEC2008#

Gn 15, 1-6 ; 21, 1-3 ; He 11, 8.11-12.17-19 ; Lc 2, 22.39-40
Bampangi ya munu ya luzolo,
Yenge ! …Zola !
Zola !...Kiese !
Ndinga ya Nzambi kezibula betu mayele samu betu sudika mbote mbote makaba nyoso yayi Nzambi medukudila betu kilumbu yayi. A batata…a bamama…Luteka matu, luteka…Ndimbidika.
Na lutangu ya ntete, yina mebakama na buku ya lubeso, Abraham kesolula na NZAMBI diambu ya kubuta ve muana na nketo na yandi Sara. Nzambi kuizaka ndima yina Abraham vuandaka sosa. Abraham vovilaka nketu na yandi Sara, yandi kuizaka yimata na bukulutu na yandi. Na lutangu ya zole, Mukanda na batu ya « Yuda », ketubila kikhulu ya Abraham, luzingu na yandi yonso kemonana na lukuikinu ya kusikama na Nzambi. Evanzeli ya Santu Luka ke tubila betu disolo yina ya muana « Yezu » bamekuenda monisa na tempolo mpe kutuengusu ya Maria nakulandakana nsiku ya Moïse. Na sika yayi, banlubudi Syméon na Anne bake sudikisa mutindu muana Yezu ke kuiza zingila mpe yina ke kuiza salama na luzingu ya bambuta na yandi, betu ke kanisa mingi Maria. Yezu kele kiezila kengenga na inza ya mvimba, kansi yandi kele diaka kidimbu ya kukabuana : batu kele ke kuiza baka luvelo ya moyo samu na yandi ; ba yankaka ke kuiza zengulu nkanu kaka samu na yandi ; ba Maria, bakuizaka monisa ti samu na Yezu, muana na yandi, yandi fuanaka mona phasi mingi.
Dilongi nini betu lenda lunda na ndinga ya Nzambi betu me kuwa ? Na kulandakana mambu me tadila makuela zole yayi, Abraham na Sara mpe Joseph na Maria, kaka mutindu masonama ya Santu betu metanga ketubila betu yawu, mambu ya ngudi ke luengusa betu na luzingu ya betu ya bukristu yawu yayi. Ya ntete : lukuikinu ya kieleka ya kele kukipesa mvimba mvimba na Nzambi. Kivuvu ya mutindu yayi kekatusa mabanza ya kulemba, ya kukondua diaka lukuikinu mpe kusala ata ngolo mosi ve na ntuala ya mpasi. Ya zole : lukuikinu ya kieleka ya zona tuba ti betu ndima bampasi samu na Nzambi. Ya tatu : lukuikinu ya kieleka zona tuba kusala mambu ya mbote yina Nzambi me sala na luzingu ya betu mpe kulunda yawu. Ya iya : lukuikinu ya kieleka kepesa luzitu na nzingulu mpe minsiku ya mbote ketuadisa dingumba ya bantu. Ya tanu : Nzambi kebikaka ve banyionso yina me kukipesa na yandi lokola bana me kangama na tata ya bawu : mvutu na yandi na nyionso betu kelombaka yandi, ata ya vuanda ve mutindu betu zonina, kansi ya kele ya kufuana samu na mambote ya betu.
Lokola Ndinga ya Nzambi betu me kuwa kilumbu yayi ke tubila mingi bakala na nketo na kati ya dikuela, papa na mama, betu kebalula meso ya betu bisika nyonso mesangana kento na bakala. Betu melomba bawu balandakana mbonosono ya dikanda ya Abraham na Joseph, bakanisa na kukotisa mbote mbote na ntima bunene ya mambu betu me landa na Ndinga ya Nzambi.
Dilongi ya ntete : bakala na kento fuana lunda lukuikinu ya nnene ya Nzambi. Bazaba solula mpe kukipesa na Nzambi mutindu bana ke solulaka mpe ke kukipesa na tata ya bawu ya luzolo. Abraham na Sara badasukilaka Nzambi ve samu babutaka ve . Kansi basalaka kivuvu ya bawu na Nzambi. Maria na Joseph mpia mutindu mosi badasukilaka Nzambi ve samu yandi pesaka bawu muana yina natilaka bawu mpasi mingi ; bandimaka luzolo ya Nzambi na kivuvu mpe na kiese. Na kati ya mpasi ya bawu na dikuela bavuandaka suamina kaka na Nzambi na kukuendaka na Tempolo. Ata mbala mosi ve balozaka lukuikinu ya bawu na kundimina mambu ya kindoki to kukuenda na inzo ya bazuzi. Dilongi ya zole, yakele nzola na muninga mutindu kivuvu na Nzambi kemonisina yawu. Bamendimina kuzinga sika mosi. Konso mutu me yamba muninga na yandi. Yandi ke bika yandi ve na thangu ya mpasi: kuzanga muana, kimbevo, kusukama, kuzanga mbongo to bima ya kaka ya lunzingu. Na luzingu ya bawu ya dikuela Sara landakanaka ve Abraham na kusosa kuzaba samu na nini ba vuanaka kuenda sika yina. Yandi vuandaka nyongina ve bakala na yandi na ndambu. Abraham zabaka kuandi ti balenda buta muana ve samu Sara vuandaka kisita. Yandi vuandaka ve na dibanza ya kusekinina, kufinga kento na yandi to kufukusa yandi samu yandi vuandaka kisita. Kansi Abraham zonaka Sara na ntima na yandi yonso. Yandi vuandaka sikimisa yandi na busita yina vuandaka na yandi. Na dikuela ya Joseph na Maria, ya kele diambu ya mpasi na kundima luzingu ya mutindu yayi : Joseph mendima kuzinga na kento yina yandi mezaba mbote ti ata muana mosi ve yandi lenda buta na yandi. Kansi na ndinga ya Anzelu yandi mendima, na kivuvu, diambu yina kesala yandi mpasi. Ata sika mosi ve na masonama ya Santu, betu kemona minzonzi na dikuela ya bawu. Maria na Joseph basanganaka samu na kunuanisa mvualangani to mpasi yina salamaka na luzingu ya bawu ; ba vuandaka zolasana mpe salasana. Na mpasi ya bawu ya dikuela, bandimaka kuzinga sika mosi na nzola mpe luzitu na muninga. Ata mbala mosi ve banataka mambu ya luzingu ya bawu na bantu ya kaka. Dilongi ya tatu, yakele nzola ya bambuta na bana ya bawu. Betu zaba mpasi Maria na Joseph monaka samu na muana ya bawu Yezu : kubutuka na yandi na sika ya kiadi mpe ya kusukama. Na nima to bilumbu landilaka, batinisaka yandi na Egypte samu Herode vuandaka sosa kufua yandi. Na ntangu bakutanaka yandi na Tempolo na kati ya bakulutu vuandaka longuka Ndinga ya Nzambi, Maria na Joseph balembaka ve na mambu Yezu zabisaka bawu. Bakangamabaka kaka na muana ya bawu. Ba zonaka yandi mpe kusadisa yandi na ntima mbote. Dilongi ya iya samu na kumanisa dibanza yayi : ya kele kusangana ya Nzambi na bantu kele na inza. Na ntangu ba nataka Yezu na Tempolo Nzambi me sangana na betu bantu na kituadi na muana na yandi. Nzambi me ndima mpe me sadila nsiku ya bantu ya YUDEYI ; nsiku yina ketinda bambuta na kutambita na Tempolo muana yina me butuka. Ya kele samu na kumonisa mpe kuzingila na mbote nyonso kusangana na yandi na bantu, Yezu me nlevuka na nsiku yina.
Lokola mutubaka yawu na dilongi ya munu ya noël ; Noël ya kele Nzambi kesala kintuadi na betu bantu. Ya zona tuba ti :« Nzambi samu na betu », « Nzambi sika mosi na betu », « Nzambi na kati ya betu » ; ya kele ndinga me kituka musuni mpe me kuiza vuanda na kati ya betu cfr Jn1,14. Na yina metadila luzingu ya dikanda ; betu fuana sala na konso sika betu ke vuandaka, na baparoisse, na diocèse ya betu , kisalu yina metadila kutomisa makuela ya Nzambi. Kusadisa ba yina kezingilaka sika mosi kansi bamesala tete ve dikuela ya Nzambi, bazua sakramento yina. Kupesa malongi na bantueni samu bawu sudika diambu ya mbote kele na dikuela ya Nzambi yina dibundu kepesa. Ba fuana zaba diaka diambu yina ya kitoko mpe ya kusonga na kutuamina na dikuela ya Nzambi, na nima ba kekuiza baka bana. Batata na bamama kele na makuela ba kekuiza landakana mbonosono ya Abraham na Sara, ya Joseph na Maria na kusala na kati ya dikanda lukuikinu ya nnene na Nzambi nzola na muninga mpe kukangama na bana.
Samu na betu nyonso, betu landakana mbonosono ya Yezu yina me ndima kusangana na betu mvimba mvimba. Na mutindu yina, betu lendaka vuanda bakristu kena bukulutu, kena lukuikinu mpe kesala. Konso mutu , konso dikanda, konso buala, konso quartier, konso cité, konso paroisse na kati ya diocese mpe insi ya betu fuana zingila na kusala kintuadi ya kieleka na bantu yonso. Kintuadi yina kenata betu na kuzaba bampasi ya baninga, na kusalasana to kukabasana bima yina Nzambi me pesa betu. Ngindu ya kusala kintuadi to « Jumelage » na kati ya baparoisse yakele dibanza mekokana na bamambu ya mfunu betu zona saladila na diocese ya betu. Baparoisse kekuiza simbasana mpe kupesasana lusadisu, malongi na yina me tadila muela mpe musuni.
Mu’ zona vutudila matondo, bampangi ya betu nyoso bakusaka lutelo ya Mfumu Nzambi na Sakramento ya Dikuela mpe bayina kesalaka ngolo samu dikuela ya bawu kangama na nzola ya Nzambi. Ya’kele mbonosono yannene samu na bampangi nyonso yina kena kuzinga nsika mosi, kansi me-kokisa ntete ve bansiku ya Dibundu na yina me-tadila dikuela. Ya’kele mpia diluaku samu na kumonisa na bantueni lutelo ya dikuela ya Nzambi. Mfumu Nzambi kindisa lukuikinu, kivuvu mpe nzola ya wu.
Na kumanisa, mukena kiese mingi samu benu mepona Dikanda ya Santu Nkebi ya paroisse ya benu. Ya kele paroisse ya ntete na diocèse ya betu mepona dizina yayi. Betu ketula ntima ti paroisse ya benu kekuiza sadisa diocèse ya betu samu na kunata mambote nyonso ketadila makanda ya betu, mingi mingi luzolo na kati ya tata, mama mpe bana.
Na nyengo yayi ya Dikanda ya Santu, betu kelomba na Mfumu Nzambi samu yandi sambula benu mpe pesa na benu yonso mavimpi ya muela mpe ya nzutu na mvula yayi ya impa. Amen.