Des autorités poitico-administratives étaient présentes. Le Gouverneur de la Province, empêché, a été représenté par S. Exc. Mr Romain Poto, Ministre provincial.
Après les diapositives qui illustrent cette visite vous trouverez l'homélie de Mgr Mbuka Cyprien, cicm, en Kikongo, version originale.
Homélie
(Ml 3, 19-20 ; 2 Th 3, 7-12 ; Lc 21, 5-19)
1. Bampangi ya munu ya luzolo !
Benu batata, bamama, bandumba na matoko, mbeto na beno !
Mbote diaka !
Yenge…Zola…
Zola…Kiese !
Ntima ya munu kele ya kufuluka na kiese ya nnene na kusambila nsika mosi na benu bampangi ya munu biminaka na diocese ya Boma, kansi bubu yayi bakristu ya diocese ya Matadi.
Ya kieleka, banda lubieko ya munu ya Kipiskopu, ya kele mbala ya ntete Mfumu Nzambi me pesa betu diluaku yayi ya nnene samu ti betu koka monana, solula mpe kusambila nsika mosi. Betu vutudila Nzambi matondo pamba ve, ya kele grasia mpe nzola na yandi kena kutanina mpe kulunda betu. Na munu, diluaku ya kilumbu yayi mefulusa munu kiese samu ngonde kaka mosi me luta banda munu mekembela anniversaire ya bamvula kumi ya Kipiskopu ya munu. Bampangi ya munu, ka kiese ko…Alleluia !
2. Bana ya Nzambi
Ka kiese ko… Kiese !
Yenge…Zola !
Na lutangu ya ntete, Nlubudi Malachie (Ma 3, 10-20a), kezabisa betu ti na kilumbu Mfumu kekuiza, yandi ketumbula bayina kesalaka imbi, mpe yandi kesenda ba yina kesalaka ma mbote mpe kevuminaka yandi. Mutindu mosi, Evanzeli mpe kezabisa betu mambu me tala kilumbu Mfumu kekuiza. Bidimbu mingi ketuamina kilumbu yina : balubudi ya luvunu kekuiza na nkumbu ya Mfumu, ntoto ke kwiza zakama na mutindu ya ngolo, bimbevo ya mutindu na mutindu, nsatu, bamvita, luvasunu na kati ya makanda, kufundana minkanu, kumonoso mpasi samu na Kristu. Kansi Kristu kekebisa betu ti betu landa bantu yina ve, mpe betu mona wonga ve, kansi betu simbidila kaka yandi. Yawu yina betu tuba ti : Betu mu Yezu kaka tumfuila.
3. Ya vuana Lutangu ya Ntete to Evanzeli, Ndinga ya Nzambi kezabisa betu ti Mfumu kekuiza, kansi kilumbu, nsika mpe mutindu yandi kekuizila, moyen betu zaba yawu ikele…ve. Yawu yina attention pila mosi…Keba. Konso muntu fuana kubama. Na Lutangu ya zole, kuna santu Polo mezabisa betu wapi mutindu yandi me zingila samu na kubongama : kutovula nzutu na yandi samu na kukizingisa ; yawu yina yandi ketubila betu ti : yina ke tina kisalu, yandi bika mpe kudia. Kisalu yina ketala mambu yonso ya luzingu ya bumuntu ya betu mpe yina metala bumuela.
4. Bampangi ya munu ya luzolo, wapi mutindu betu fuana kubimina ? Lokola santu Polo, nakulandakana mbonosono ya yandi, betu fuana vuanda bantu ya kisalu : kukipesa mvimba samu na makanda ya betu, samu na insi ya betu, samu na Dibundu ya betu mpe nsika yonso ketu kezingilaka.
5. Ya ntete : na makanda ya betu. Bayina kekwendaka zungana pamba pamba kondwa kusala konso kisalu, bakekotisa bumpumbulu na bainzo mpe na makanda. Yina zaba ve kulunda inzo na yandi mosi, bampangi na yandi, bayina ke salaka na yandi ; yina zaba ve kuvovila babimpumbulu to kukaka bantu, yandi lenda ve kutuadisa dikanda ya yandi.
6. Ya zole : na insi ya betu. Betu zona ndembama. Na Nsiku ya transition beto metanga ti hymne national ya betu ke tuba ti : « telema nge Congolais mpe Congolaise » ; mpe devise ya betu kele « démocratie, justice et unité ». Yawu yina bampangi ya munu, mambu betu fuana zaba . Betu nyonso zona ti insi telema, insi… telema ; betu zona insi ya mbote, insi ya… mbote ; betu zona ti busonga, lubundanu yadila betu. Samu ti, sika kele kifu ya madezo ya bana, kifu ya kukivavila ntete, kifu ya nzola ya mbongo na lukumu, kifu ya luvunu mpe kutuba ya mpamba, kifu ya ki muana mama mpe ki muana tata, kifu ya makhese mpe minduki, kifu ya luniemo mpe kukiyana : ndembama lenda vuanda ata fiote ve. Betu kezona Batuadisi ke sosa ndembama, lubundanu, nguizani, luzitu ya luzingu ya bantu ; « keti kiadi madi mu…mu ntima ». Betu kezona Batuadisi ya kusonga mpe ya nzola ; betu mezona bantu ya buvumbama, ke zonaka insi, ke zaba lembolo mambu. Mutindu mosi : kuyiba, madezo ya bana, kukuenda na kisalu ve, to kukuenda na retard konso kilumbu, kufua bima ya ngana to ya leta lenda tunga insi ya betu ve mpe kubongisa nthomosono na yawu ve.
7. Bampangi ya munu ya luzolo, A bue, lu mevonga ? Sambila kuetu tu…tunsambila. Ya tatu : Na kukubama samu na ndiza ya Mfumu, betu mpe fuana kukipesa mvimba samu na Dibundu ya inza ya mvimba. Ba Dioceze ya betu me-salaka ba mvula mingi ; bantu ya catholiques kele mingi ; banganga-nzambi mpe bakele, bayina semoko, babakala mpe banketo, badiocesains to bamissionnaires, bakena kumaka kaka mingi. Balaïcs zona sala na mutindu ke’lombila Dibundu : baMacs mpe ba Chorales kele mingi mpe ya kunieva. Betu lenda lomba na ba dioceses ya betu ti bawu zingila na bumbuta mpe bawu lemba kulomba na bainsi ya nzenza ; bawu mpe bakituka « basadisi » na kunataka na Dibundu ya inza ya mvimba dikaba ya bawu ya malonga. Betu fuana kota na kisalu ya kuyamikisa nsangu ya mbote ya inza ya mvimba lokula Dibundu me-kuma mbuta.
8. Dibundu ya inza ya mvimba ya kele lokola Dikanda. Samu na kuzingisa dikanda, samu na kusadisa dikanda na kubongisa bamambu, bakulu ya betu vuandaka mayele na kubimisa diambu mosi bake’bokidilaka ti « Mbongi », yina zona tuba ti sanduku ya dikanda. Mfumu ya dikanda yandi nde bakaka kiyekua ya sanduku yina. Inzo na yandi vuandaka songa lubundunu ya dikanda. Konso famille, kinama ya dikanda, vuandaka na kifulu na yandi na sanduku. Mpe konso famille fueteke nata bambala mingi yina yandi ke’baka samu ti mfumu ya dikanda koka kubongisa bamambu ya konso famille (kubutuka, kulongisa, makuela, kukabuana na makuela, mafua). Na Dibundu ya Nzambi na inza ya mvimba, inki kele famille ? Diocèse. Yawu yina, samu na benu, famille ya benu kele diocèse ya…Matadi. Benu lenda lemba ve na kukipesa mvimba samu na diocèse ya benu, awa na Matadi. Na kiyekua yina kele na bakristu samu na kusadisa diocèse ya bawu, bunzumbi ya bakulu ya betu ke’kienzusa betu. Bangana mingi ke’monisa yawu ; betu lenda tanga lokola : nsinga usietolongo va kuma di ngana ko ; kiaku kiaku, kingana kingana ; kivanu kiyukutungu ko ; ngo didi kidi manzi, ngolo ziandi ka sidi. Awa mpe betu lomba ti : « Makuku matatu matelimina nzungu, benu kukipesa benu yonso na kusadisa diocèse ya benu na bukieleka na bamfunu na yandi yonso ». Lungonya samu na mambote nyonso benu me sala awa na diocèse ya benu ya Matadi.
9. Na kukindisa benu na lukuikinu ya benu, muketebusa benu ntima ti benu fuana kukipesa mpia samu na Dibundu yina mebuta benu to benu biminaka. Bakhaka ya betu tubaka ti : A kiazi ki ngazi …kizimbangana tsisi dibako. Yawu yina benu zimbangana ve ku baka ba « Bon » de souscription. Na nzietolo yina musalaka na Pointe-Noire na ngonde ya septembre ya mvula yayi, mu kindisaka mpe sudikisaka diambu yayi na bampangi ya betu biminaka na diocèse ya Boma. Bubu yayi, na benu mu ke zabisa diaka yawu. Abenu lumwa kuenu…Lunsudika ?
10. Na kumanisa. Betu vutudila difunda ya matondo na Nganga Mbuta ya betu, Mgr Kembo Gabriel, na kilandi na yandi Mgr le Vicaire Général, Dinzolele Philippe, buela diaka Président ya Zone apostolique mpe curé ya paroisse ND de Fatima, Mr l’abbé Kusengana, nakuzimbana ve banyonso yina kesala na Dibundu mpe benu nyoso mesangana awa.
11. Bika Mfumu Nzambi ya betu pesa benu nyonso mamvimpi ya nzutu mpe ya muela.
12. Fiofi kuandi fibedi yama, ka fikalanga yamako, ayi kuenda ayi kuiza… abu…phia.
Mbuka Cyprien, cicm
Evêque de Boma
No comments:
Post a Comment